सान्या, चीन / चीनको सान्यामा जारी छैटौँ एसियन बिच गेम्स अन्तर्गत महिला कबड्डीमा नेपालले आफ्नो अपराजित यात्रा कायम राख्दै सेमिफाइनलमा स्थान सुरक्षित गरेको छ। आज भएको समूह चरणको अन्तिम तथा निर्णायक खेलमा थाइल्यान्डलाई ३८–२६ को स्कोरले पराजित गर्दै नेपाल समूह विजेताको रूपमा अन्तिम चारमा प्रवेश गरेको हो।
समूह ‘बी’ मा रहेको नेपालले यसअघि चाइनिज ताइपेई र बंगलादेशलाई पराजित गरिसकेको थियो। आजको खेलमा पनि सुरुआतदेखि नै आक्रामक खेलेको नेपाली टोलीले थाइल्यान्डमाथि १२ अंकको स्पष्ट अग्रता बनाउन सफल भयो। नेपालको जितमा कप्तान मानमती विष्ट र रेडर मेनुका राजवंशीले उत्कृष्ट प्रदर्शन गर्नुभएको थियो।
समूह विजेता बनेसँगै नेपालले अब सेमिफाइनलमा अर्को समूहको उपविजेतासँग प्रतिस्पर्धा गर्नेछ। लगातार तीन जित निकालेपछि नेपाली टोली पदकको निकै नजिक पुगेको छ। यस प्रतियोगितामा कबड्डीतर्फ सेमिफाइनल पुग्ने टोलीले कम्तीमा कांस्य पदक पक्का गर्ने प्रावधान रहेको छ।
नेपालले अब समूह ‘ए’ को उपविजेता श्रीलंकासँग सेमिफाइनल खेलमा प्रतिस्पर्धा गर्ने नेपाली टिमका प्रमुख कोच रतिया राजवंशीले बताउनुभयो।