भद्रपुर १९, बैशाख / झापाको भद्रपुर नगरपालिकाबाट शुरू गरी झापाको निर्वाचन क्षेत्र नं.३ मा आज साइकल यात्रा गरिएको छ।भद्रपुर साइकल समाज र भद्रपुर ५ न. वडाको संयुक्त आयोजनामा “टुर दि भद्रपुर” नामाकरण गरिएको साइकल यात्रा-२०८३” आज विहान शुरू गरेर बेलुका सम्पन्न गरिएको हो।
भद्रपुर नगरपालिकाको कार्यालय परिसरबाट सुरु गरिएको साइकल यात्रा विभिन्न धार्मिक, ऐतिहासिक तथा पर्यटकीय स्थल हुँदै चन्द्रगढीस्थित महेन्द्र पार्कमा पुगेर सम्पन्न भएको छ। यात्रामा पश्चिम महाकाली खाईदेखि नेपालका विभिन्न जिल्लाका साथै भारत र भूटानका समेत साइकल राइडरहरू सहभागी रहेको भद्रपुर साइकल समाजका अध्यक्ष जीवनकुमार श्रेष्ठले जानकारी दिनुभयो ।
स्वस्थ जीवनशैली प्रवर्द्धन, प्रदूषण न्यूनीकरण र आन्तरिक पर्यटन विकास गर्ने उद्देश्यसहित आयोजना गरिएको यस कार्यक्रममा २३७ जनाको सहभागिता रहेको जनाइएको छ। १३ वर्षीय बालकदेखि ७५ वर्षमाथिका वृद्धसम्म सहभागी रहेको साइकल यात्रामा महिलाहरूको उपस्थिति उत्साहजनक थियो। यात्रामा ८० देशको साइकल यात्रा गरिसक्नु भएका अजित वराल तथा राष्ट्रिय एवं विभिन्न जिल्लाका साइकल संगठक हरूको सहभागिता रहेको थियो। यात्रामा रेडक्रसलगायत स्वास्थ्यकर्मीको टोली, साइकल मर्मतका लागि प्राविधिक टीम र ठाउँ ठाउँमा पानी खाजा र स्वागतका साथै सहभागीलाई खानाको बन्दोवस्त पनि गरिएको थियो।
साइकल यात्रीहरूले भद्रपुर नगरपालिका, छिमेकी पालिकाहरु कचनकवल र हल्दिबारीका पर्यटकीय दृष्टिकोणले महत्वपूर्ण विभिन्न पुरातात्विक धार्मिकस्थल, पर्यटकीयस्थल एवम् वन तथा सिमसार घुम्दै यात्रा गरेका छन्। यात्राका क्रममा उनीहरूले भद्रपुरको पुरातात्विक ऐतिहासिक धार्मिकस्थल कीचकबध, कमलधाम संयुक्त धार्मिकस्थल, भद्रपुरको दक्षिणी क्षेत्रका सिमसार क्षेत्र हुँदै नेपालकै सबैभन्दा होचो स्थान कचनकवल गाउँपालिकाको कचनकवलस्तम्भ, दुर्गाभिट्टा सामुदायिक वन, जैविक विविधताले भरिपूर्ण जलथल जंगल हुँदै हल्दिबारीको पाथीभरा-कालिका सामुदायिक वन, पाथीभरा सिंहकाली धार्मिक तथा पर्यटकीय क्षेत्र, भेलागुडी सिमसार, झोलुंगे पुल, कलवलगुरी प्रादेशिक, अनुसन्धान तथा प्रशिक्षण प्रतिष्ठान हुँदै अपरान्ह चन्द्रगढीको महेन्द्र पार्कमा पुग्दा लगभग ६८ किलोमिटर बढीको यात्रा गरिएको छ।
अहिले साँझमा स्थानीय होटल डे–ग्लोमा सांस्कृतिक प्रस्तुतिका साथ कार्यक्रम समापन गरिएको अध्यक्ष श्रेष्ठले जानकारी दिनु भयो ।भद्रपुर नगरपालिकाका प्रमुख गणेश पोखरेलको प्रमुख आतिथ्यमा भएको कार्यक्रममा स्वस्थ तथा प्रदूषणमुक्त समाज निर्माण, आन्तरिक पर्यटन प्रवद्र्धन एवम् नेपालको सबैभन्दा पुरानो नगरपालिकामध्येको एक भद्रपुर नगरपालिकाको पहिचान थप उजागर गर्ने उद्देश्यले टुर दि भद्रपुर आयोजना गरिएको जानकारी गराइएको थियो। कार्यक्रममा निरन्तर साइकल यात्रा गरेर स्वस्थ जीवन निर्वाह गर्ने १२ जना ज्येष्ठ नागरिकहरू नीलमणि नेपाल,खगेन्द्र लम्साल,हरिप्रसाद तिम्सिना,हेमप्रसाद खनाल,कृष्णविलास वन लगायतलाई ससम्मान कदर पत्र प्रदान गरिएको कार्यक्रमका संयोजक भुवन गिरीले जानकारी दिनु भयो।कार्यक्रमको सन्चालन आरोग्य तिम्सिनाले गर्नुभएको थियो ।